Варта адзначыць, у гэтым сельгаспрадпрыемстве стаўку робяць больш на малако і мяса, чым на збожжа. Зараз агульнае пагалоўе налічвае 2577 галоў. З іх 772 - дойныя каровы, 515 - быкі і 1068 - цёлкі. Па ўдоях гаспадарка займае лідзіруючыя пазіцыі ў раёне: кожная карова ў дзень дае 22 кг. малака, за суткі - каля 17 тыс.кг., 94,5% здаецца дзяржаве.
Жывёлы ўтрымліваюцца ў шасці сучасных цёплых хлявах. Малочна-таварная ферма і таварная ферма №1 знаходзяцца ў Шапчыцах, таварная №2 - у Аляксандраўцы.
У цяперашні час на цэнтральнай ферме ўзводзіцца новы хлеў для размяшчэння сухастойных кароў на 300 галоў, што дазволіць планава павялічваць пагалоўе. Менавіта гэта і з'яўляецца адной з асноўных задач. Будуецца хлеў па сучасных тэхналогіях, аснашчэнне адпаведным абсталяваннем дазволіць мінімізаваць ручную працу і колькасць персаналу.
Як распавёў намеснік дырэктара "Шапчыц-агра" Мікалай Жалдак, узводзіць хлеў пачалі ў кастрычніку мінулага года. З абласнога і раённага бюджэтаў на гэтыя мэты было выдзелена 120 тыс.рублёў. Усе работы праводзяцца ўласнымі сіламі. Плануецца, што ў першым паўгоддзі аб'ект здадуць у эксплуатацыю. Сам будынак ужо гатовы. Таксама зараз робяць выгульны дворык, галерэю, мантуюць сістэму навозавыдалення, затым зоймуцца добраўпарадкаваннем тэрыторыі.
Крыніца: minsk-region.gov.by