Так, 45-тонны самазвал БЕЛАЗ-75476 з газапоршневым рухавіком тэсціруецца на пляцоўках буйнейшай алмазаздабыўной кампаніі "Алроса". Спачатку былі выпрабаванні ў кар'еры Ламаносаўскага горна-абагачальнага камбіната ў Архангельскай вобласці, цяпер іх прадоўжаць на Мірнінскім горна-абагачальным камбінаце.
"Асноўнае - гэта, вядома, атрымаць паказчыкі работы кар'ернага самазвала ў частцы грузаперавозак, а таксама па цыклах прастояў для запраўкі і рамонту, калі такое будзе мець месца, каб у цэлым ацаніць плюсы прымянення такога рашэння на нашай пляцоўцы. Мы можам забяспечыць магчымасць запраўкі газам як мінімум дзесяці такіх самазвалаў", - адзначыў намеснік выканаўчага дырэктара АК "Алроса" Руслан Сізонаў.
Частка гарнарудных запасаў кампаніі "Алроса" знаходзіцца ў цяжкадаступнай мясцовасці, куды можна даставіць дызельнае паліва толькі ў перыяд навігацыі, таму яго завозяць адразу на год наперад. Пры гэтым побач размешчаны буйныя радовішчы прыроднага газу, якія лагічна выкарыстоўваць у якасці паліва, разлікі паказваюць, што сабекошт газу ў разы ніжэйшы за кошт дызеля.
Акрамя таго, з удзелам БЕЛАЗа ў Мурманскай вобласці на ўсходнім рудніку Кіраўскага філіяла АТ "Апатыт" рэалізуецца праект па пераводзе кар'ернай тэхнікі на газадызельны рэжым. Праект накіраваны на аптымізацыю вытворчых затрат АТ "Апатыт" і зніжэнне сабекошту адкрытых горных работ.
На Кіраўскай пляцоўцы АТ "Апатыт" з'явіцца модульны комплекс па запраўцы самазвалаў БЕЛАЗ звадкаваным газам. Звадкаваны прыродны газ будуць дастаўляць запраўшчыкамі і захоўваць у рэзервуары модульнага комплексу. Запусціць комплекс у эксплуатацыю плануецца гэтай восенню. Пад запраўку ЗПГ пераабсталяваны ўжо два кар'ерныя самазвалы БЕЛАЗ. Наперадзе доследна-прамысловыя выпрабаванні велікагрузных машын.
ААТ "БЕЛАЗ" - кіруючая кампанія холдынга "БЕЛАЗ-Холдынг" - буйнейшы сусветны вытворца кар'ерных самазвалаў і транспартнага абсталявання для горназдабыўной і будаўнічай прамысловасці. Займае каля 30 працэнтаў сусветнага рынку кар'ерных самазвалаў асабліва вялікай грузападымальнасці. Вырабляе самы вялікі ў свеце кар'ерны самазвал грузападымальнасцю 450 т.
Крыніца: minsk-region.gov.by
