У гэты дзень iнфармацыйна-прапагандысцкая група пад кіраўніцтвам старшыні райвыканкама Сяргея Пілішчыка сустрэлася з працоўным калектывам Капыльскага філіяла «Аўтамабільны парк № 21» ААТ «Мінаблаўтатранс».
Некаторыя ўдзельнікі сустрэчы скарысталіся магчымасцю і звярнуліся да старшыні райвыканкама Сяргея Пілішчыка з асабістымі пытаннямі
Удзел у мерапрыемстве прынялі таксама начальнік аддзела арганізацыйна-кадравай работы райвыканкама Ала Кабушка, дырэктар філіяла Уладзімір Сахар і старшыня Цімкавіцкага сельвыканкама Алена Вострыкава.
Па асноўнай тэме дня інфармавання выступіў эканаміст прадпрыемства Валянціна Радкевіч. У ходзе даклада было адзначана, што забеспячэнне эфектыўнай занятасці насельніцтва грае найважную ролю ў рэалізацыі сацыяльнай палітыкі Рэспублікі Беларусь. У ліку ключавых дзяржаўных задач застаецца і рост даходаў, а таксама забеспячэнне годнага ўзроўню і якасці жыцця насельніцтва краіны.
Пра тое, як ідуць справы ў Капыльскім аўтапарку - як па пытанні з парадку дня, так і ў цэлым - праінфармаваў дырэктар філіяла Уладзімір Сахар. Рост узроўню заработнай платы, планамернае абнаўленне аўтапарка, папаўненне шэрагаў заказчыкаў для забеспячэння перспектыўнага функцыянавання прадпрыемства - той курс, якому верны філіял у апошні час. Маюцца, вядома ж, і праблемы. Самая вялікая з іх — гэта недахоп кіроўцаў.
Працу філіяла пракаментаваў Сяргей Пілішчык. Старшыня райвыканкама звярнуў увагу на тое, што сярэдняя заработная плата прадпрыемства за мінулы год (а яна склала 854 рубля) — паказчык вышэй за сярэдні па раёне. Хоць імкнуцца ўсё ж ёсць да чаго. Станоўчую ацэнку атрымала таксама значнае павелічэнне рэнтабельнасці філіяла. Пры гэтым быў адзначаны той факт, што «плюсаў» атрымалася дамагчыся ва ўмовах сур'ёзнай канкурэнцыі з боку прыватных пасажыра - і грузаперавозчыкаў, якія забіраюць самы прыбытковы сегмент рынку. І хай рост прыбытку адбыўся ў асноўным толькі за кошт грузаперавозак — на тое ёсць прычына. Бо ў сучасных рэаліях, калі колькасць аўтамабільнага транспарту пастаянна павялічваецца, перавозка пасажыраў для аўтапаркаў раённага ўзроўню ўсё больш набывае сацыяльны характар і становіцца нявыгадным, але ўсё ж неабходным відам паслуг.
Сяргей Пілішчык таксама давёў да ведама прысутных інфармацыю па зваротах у райвыканкам датычачыхся працы аўтапарка. Летась іх паступіла 9. Усе яны былі разгледжаны і атрымалі кампетэнтныя адказы. Падчас сустрэчы прагучаў каментар з нагоды аднаго з такіх зваротаў. Так, ад кіроўцаў аўтобусаў філіяла паступіла скарга на недастаткова добрае жвіровае пакрыццё дарог раённага падпарадкавання. Пры гэтым праводзілася параўнанне з суседнім Клецкім раёнам. Як патлумачыў сітуацыю старшыня райвыканкама, тэрыторыя Капыльшчыны значна больш, чым суседнія рэгіёны. Адпаведна, больш і працягласць дарожнай сеткі. У той жа час абслугоўвае яе прыкладна такая ж колькасць работнікаў. А адсюль як раз-такі і ўзнікаюць праблемы і, як вынік, даволі частыя звароты да мясцовай улады, звязаныя з нездаволенасцю працай адпаведных служб.
Акрамя размовы на пазначаныя тэмы, Сяргеем Пілішчыкам быў узяты на заметку зварот, які паступіў з залы з нагоды неабходнасці ўзмацнення кантролю за асобнымі аспектамі ажыццяўлення пасажыраперавозак маршрутнымі таксі.
Аксана Міхайлоўская
«СП» http://www.kopyl.by
