Рэспубліканскі суботнік прайшоў 12 красавіка ў Беларусі, паведамляе БЕЛТА.
Мерапрыемства праводзілася на добраахвотнай аснове. Беларусы добраўпарадкавалі і прыводзілі ў належны стан аб’екты і тэрыторыі населеных пунктаў, гісторыка-культурныя каштоўнасці, мемарыяльныя комплексы, месцы баявой і воінскай славы, пахаванні воінаў і партызан часоў Вялікай Айчыннай вайны. Таксама суботнік можна было правесці на рабочых месцах.
Дзяржорганы і мясцовыя ўлады праводзілі суботнік на месцах, добраўпарадкавалі і прыводзілі ў парадак гісторыка-культурныя каштоўнасці, тэрыторыі населеных пунктаў, рыхтавалі дзіцячыя аздараўленчыя і спартыўна-аздараўленчыя лагеры да летняга сезона. Частка прадстаўнікоў беларускіх ведамстваў высаджвалі лес на бураломных участках, такім чынам падтрымліваючы акцыю «Дай лесу новае жыццё» ў апошні дзень яе правядзення.
Работнікі, якія ўдзельнічалі ў суботніку, павінны былі быць забяспечаны неабходным інструментам, інвентаром, сродкамі індывідуальнай аховы (пальчаткамі або рукавіцамі, пры рабоце на праезнай частцы — сігнальнымі камізэлькамі, пры рабоце на будаўнічым аб’екце — ахоўнымі каскамі).
Грашовыя сродкі, заробленыя ў дзень правядзення суботніка, у тым ліку на рабочых месцах, пойдуць на будаўніцтва Нацыянальнага гістарычнага музея Беларусі.
Як паведамлялася раней, Прэзідэнт Беларусі Аляксандр Лукашэнка 5 лютага падпісаў указ нумар 50, якім прадугледжваецца будаўніцтва ў 2025-2027 гадах у раёне вуліцы Арлоўскай у Мінску Нацыянальнага гістарычнага музея Беларусі, парку Народнага адзінства і стварэнне пастаяннай экспазіцыі музея. Музею прысвоены статус Усебеларускай маладзёжнай будоўлі, удзел у якой могуць прыняць маладыя людзі ва ўзросце да 31 года, у тым ліку ў складзе студэнцкіх атрадаў.
Новы будынак праектуецца ў форме карты Беларусі.
Крыніца: belta.by
