9 лiпеня, Копыль /Уласн. iнф./. Да 735-годдзя Капыля, 85-годдзя з дня ўтварэння Капыльскага раёна, Года роднай зямлі аддзел па справах моладзі сумесна з райкамам ГА “БРСМ” і райсаветам ГА “БРПА” правялі конкурс малюнкаў і фотаздымкаў пад назвай “Капыльская радзімая зямля”. Каля сямідзесяці работ вучняў гарадскіх і сельскіх школ, а таксама працоўнай моладзі было прадстаўлена на суд журы.
2 ліпеня жыхары горада і раёна, дэлегацыі з Літвы і Расіі, якія завіталі да нас на свята, змаглі пазнаёміцца з лепшымі творамі, што знайшлі сваё месца ў Галерэі мастацтваў гімназіі № 1 Капыля. На адкрыцці выставы гасцей сустракалі самадзейныя артысты гэтай навучальнай установы, а намеснік старшыні райвыканкама па пытаннях сацыяльнай сферы і ідэалагічнай рабоце Ала Раеўская і начальнік аддзела па справах моладзі Наталля Лятчэня ўручылі пераможцам і прызёрам конкурсу граматы і памятныя падарункі. Сярод вучнёўскай моладзі лепшымі прызнаны малюнкі Дар’і Пінчук, Зарыны Пархімовіч, Галіны Чарнушэвіч, Надзеі Яўсючэні, сярод працуючай – Ганны Нічыпаровіч, Вольгі Латковіч і Ірыны Міхайлоўскай. Лепшымі фотаздымкамі названы работы Сяргея Лазоўскага і Паўла Печанко.